Virkni og Vellíðan er verkefni sem miðar að heilsueflingu fyrir 60 ára og eldri í Kópavogi.

Þátttakendur í verkefninu Virkni og Vellíðan fá tækifæri á því að stunda hreyfingu í því félagi sem stendur næst heimili þeirra í Kópavogi. Okkar helsta markmið er það að stuðla að bættri líkamlegri, andlegri og félagslegri heilsu bæjarbúa í Kópavogi og stuða jafnframt að farsælli öldrun.

Fyrirkomulag verkefnisins miðast við hópþjálfun undir handleiðslu þjálfara 2-3x í viku í um 45 mínútur í senn. Á æfingum er lögð áhersla á fjölbreytta þjálfun og er það í samræmi við það sem rannsóknir hafa sýnt, að fjölþætt þjálfun sem innheldur styrktar-, þol-, liðleika- og jafnvægisæfingar eru æskilegar eldra fólki. Æfingar fara fram innan íþróttahúsanna þriggja Breiðablik, HK og Gerplu. Þjálfarar útbúa 6-8 vikna æfingaráætlun og aðlaga æfingar út frá líkamlegri getu hvers og eins.

Á miðvikudögum eru öðruvísi æfingar í boði fyrir þá sem vilja æfa 3x í viku. Annan hvern miðvikudag bjóðum við upp á æfingar í fimleikasal Gerplu (Íþróttamiðstöð Versölum) en á þeim æfingum er meiri áhersla lögð á liðkunn og teygjuæfingar. Hina miðvikudagana bjóðum við upp á Zumba eða Quigong. Þær æfingar fara fram í Breiðablik (Fífunni) eða HK (Kórnum). Hægt er að sjá stundaskrá fyrir þessar æfingar inni á facebook síðu verkefnisins.

Virkni og Vellíðan leggur einnig áherslu á heilsulæsi hjá þátttakendum og því er reglulega boðið upp á fræðslu fyrirlestra. Þá fáum við til okkar fræðimenn sem flytja fyrir okkur erindi um ýmis málefni á borð við næringu, svefn, geðheilsu og fleira.
Á hverri önn stendur Virkni og Vellíðan fyrir félagslegum viðburðum.

Vorönn 2023 stendur frá 16.janúar – 2.júní. og kostar 17.500 kr að taka þátt sem er 3500 kr á mánuði. Hægt er að skrá sig í gegnum netfangið okkar virkniogvellidan@gmail.com eða í gegnum facebook síðu verkefnisins. Verið er að vinna að heimasíðu fyrir Virkni og Vellíðan.

Vertu með í Virkni og vellíðan í Kópavogi!